Дархлаа ... буюу Immunity/ "дархлагдсан дарга шүүгч" БАЙХ УУ?

Бие даасан, Хариуцлагатай шүүхийн төлөө

Дархлаа ч уг нь сайн зүйл л дээ. Хүний бие дархлаа сайтай бол тэр бүр муу юм халдахгүй гэдэг дээ. Байгууллага ч ялгаагүй байх. Гэхдээ дархлаа хэтэрвэл чанаргүй, чадваргүй, ажилдаа тэнцэхгүй этгээдүүд ДАРХЛАГДАЖ, улмаар хөгжил, дэвшил үгүй болдог. Түүнчлэн дархлахын өмнө өндөр шалгуур тавигддаг даа, жишээ нь Монгол бөхөд бол дархан аврага болохын тулд мөн ч их хөлс хүч, олон жилийн нөр их хөдөлмөр зарцуулж байж нэг юм болдог биз дээ.

Аливаа асуудалд дархлаа байх нь зайлшгүйн зэрэгцээ хэмжээ, хязгаар гэж байх ёстой. Шүүхийн боловсон хүчний асуудалд ч гэсэн ялгаагүй.
Шүүхийн тухай хуулийн 32 дугаар зүйлийн 32.4, 32.6 -д зааснаар "Аймаг, нийслэлийн шүүх, сум буюу сум дундын, дүүргийн шүүх, дагнасан шүүхийн Ерөнхий шүүгчийг Ерөнхий зөвлөлийн санал болгосноор Ерөнхийлөгч зургаан жилийн хугацаагаар томилох" бөгөөд "Ерөнхий шүүгчийг тухайн шүүхэд нэг удаа улируулан томилж" болдог зохицуулалттай билээ.

Харин зарим нэг хүмүүсийг ажиглаад байхад “хийж бүтээж гавихгүйгээр барахгүй бүр эсэргээрээ” дахин удирдах ажилтнаар ажиллуулах ямарч бололцоогүй, чадваргүй, хамт олны дунд ямар ч хүлээн зөвшөөрөлтгүй болчихсон байтал нь зүтгүүлээд, нөгөө нь зүтгэсээр байгаад болчих юм.

За тэр хүн яахав гэж бодож болохгүй нь ээ цаана ажил, тэр тусмаа маш хариуцлагатай хүний эрх, бүр амь амьдрал шийддэг бүхэл бүтэн шүүхийг тэр хүн чинь зөв, шударга, хуульд нийцүүлэн зохион байгуулах үүрэгтэй хүн шүү дээ. Шүүхийг зохион байгуулах, менежментийн хувьд зөв удирдаж авч явахаас ихээхэн зүйл хамаарч байгаа учраас бид үүнд зайлшгүй анхаарал хандуулах ёстой.

Шүүх бүр тус тусдаа бие даасан байгууллага болохын хувьд тухайн шүүхийн өнгө зүс, олны дундах нэр төр нь түүнийг удирдан зохион байгуулах /эрх мэдэл гэхээс илүү/ үүрэг, хариуцлага бүхий “Ерөнхий шүүгч” –ийн менежментийн арга барилаас ихээхэн хамаарна.

Гэтэл тухайн хүний "боломж, нөөц" нь аль хэдийнэ дуусаад, шавхагдаж гүйцсэн төдийгүй, зарим нь бүр мөрөөрөө ажлаа хийгээд явахын оронд харин ч тухайн шүүхийн үйл ажиллагаанд “хүндрэл учруулж” ерөнхий шүүгчийн зохион байгуулалтын эрх хэмжээг шүүгчдийг, шүүхийг даргалах эрх хэмээн итгэсэн этгээдүүд шударга, нээлттэй өрсөлдөөнийн хязгаарлан энэ албанд дархлагдсан амьтан аяатай дахин дахин томилогдож, одоо бүр нэг шүүхэд 12 жил болоод хугацаа нь дуусах дөхөөд ирэхээр нөгөө шүүхэд нь шилжин залардаг болооод байна. Арай ч дэнднээ, ажил хэрэг, чадвар, шударга байдлаараа шалгарсан хүний тухайд бол ямарч асуудалгүй л дээ гэхдээ дээрх байдлаар дархлагдсан дарга шүүгч нарыг хараад байхаад авах юм алга даа даанч.

Шүүхийн удирдах албан тушаал хаших хугацааг Улсын Дээд шүүхийн Танхимын тэргүүний албан тушаалд томилогдож буй хугацаатай ижилтгэж ерөнхий шүүгчийн албан тушаал хаших хугацааг 3 жил болгох хэрэгтэй. Харин тухайн шүүхэд ерөнхий шүүгчээр улиран томилогдох боломжийг 3 жилээр дээд тал нь 3 удаа байхаар, ингээд ч одоогийн боломжоос богино байх юм. Учир нь удирдах албан тушаалд нэг хүн олон жил (12 жил зөвхөн нэг шүүхэд ажиллах боломж) ажиллах нь эхлээд уг хүнд өөрт нь, дараа нь тухайн шүүхэд, эцэст нь шүүхийн тогтолцоонд цөөнгүй сөрөг үр дагаварыг авчирч байна. Шүүхэд хэн нэгний дэмжлэгт хэт горилсон тогтолцоо бүрдэх шинжтэй байна. Шинэтгэл “боловсон хүчнээр дамжиж” хийгдэх нь гарцаагүй. Тиймээс ажил албан тушаал дэвшүүлэх зэрэг асуудалд “merit” тогтолцоог хэрэгжүүлэх. Боловсон хүчний нөөц хүрэлцэхгүй, ачаалал хэтэрсэн учир хэрэг маргааныг “чанартай” шийдвэрлэх үндсэн зорилгод сөргөөр нөлөөлж байна.

1826 уншигдсан.

Сэтгэгдэл бичихийн тулд нэвтэрсэн байх шаардлагатай. Та бүртгэлгүй бол энд дарж бүртгүүлээд нэвтрээд, бүртгэлтэй бол энд дарж нэвтрээд сэтгэгдэл оруулах боломжтой.

Сэтгэгдлүүд

2011-04-02 - Ерөнхий шүүгчийн хонзон

Бичсэн: холын зочин (зочин)

ЭНЭХҮҮ БЛОГИЙН ЭЗЭН ЦОГТ ТАНД АЖЛЫН АМЖИЛТ БОЛОН ЭРҮҮЛ ЭНХИЙГ ХҮСЬЕ ТАНЫГ ДЭМЖИЖ ЯВДАГ ШҮҮ. АМЖИЛТЫН ТӨЛӨӨ УРАГШАА гоё шүү баярлах